Украиналӧн медся асыввыв юкӧнын, Луганскын вӧчсис военнӧй переворот. Такӧд йитӧдын кӧсъя донъявны лоӧмторсӧ, вӧзйыны некымын версия.
Ӧти-кӧ, Кремль чӧв оліс, эз сет некутшӧм комментарий. Кӧть эськӧ сувтны кӧ Путинлӧн была вылӧ, то вӧчсис власть кымыньтӧм, переворот. Мыйта российскӧй пропаганда чилзіс, кор Киевын тодмышкалісны Януковичӧс, чужйисны сылы сітанас. Тайӧ переворот, хунта да с.в. Оз пӧ позь властьсӧ некор да некӧн вынӧн чӧвтны, властьыс пӧ – тайӧ вежны позьтӧмтор, вежатор. Но вӧлӧмкӧ, Кремль серти, Януковичӧс оз позь вӧтлыны, а Плотницкийӧс позьӧ.
Мӧд-кӧ, вермас лоны тані петкӧдчӧ россияса властьлӧн гуся спецоперация. Медым аддзыныв помка ӧтдортчыны Минскса сёрнитчӧмъясысь, киритны сылысь вынсӧ. Боръя кадӧ ёсьмӧм косьыс подувтӧ тайӧ мӧвпсӧ.
Коймӧд-кӧ, сійӧ мый лоис Луганскын петкӧдлӧ, мый кымын чорыдджыка централизуйтӧма политическӧй систамыс, сымын ыджыдджык виччысьӧмтор суӧ сійӧс. Та йылысь ме гижлі нин некымын статья. Не лоны косьыс эз вермы. Тоталитарнӧй система, коді чорыд кабыр улын кутӧ ставсӧ, ворссьӧ кадлы, кад визувтӧмлы. Кадыс вынаджык системаысь.
Сідз шусяна «Пражской тулыс» 1968-ӧд вося да ӧнія Луганск – веркӧсас кӧ видзӧдлыны – абу ӧти балаатор. Найӧ разнӧйӧсь. Но ӧткодьыс век жӧ эм, – системалӧн пытшкӧссянь жебмӧм да чиръясьӧм-крӧшитчӧм. Тайӧ – лючкиа сӧвмыны абу позянатор.
Тоталитаризм дырйи век ыджыдалӧ бандитъяслӧн методъяс. Налӧн бала-ног. На костын лючкиа-лада оласногыс оз овлы, сӧмын ӧта-мӧдӧс пӧдтӧм. Некутшӧм компрмисс, ӧти балаӧ воӧдчӧм абу.
Россиялӧн аскиалуныс артавсьӧ буретш Украинаын, стӧчджыка кӧ, Донбассын. Ворссяс кӧ сэні империя, то сійӧ здукӧн киссяс. Национальнӧй кананъяс вылӧ. Тайӧ сайт вылас кодсюрӧ оз вермы ӧвсьыны да век усьласьӧ коми кыв вылӧ. Веськыда шуа, непоштӧ республикалӧн, но и коми да мукӧд нероч кывлӧн аскиаыс решайтсьӧ Донбассын.
Империяяс киссьывлісны либӧ пельӧсъяссянь, суйӧрбердса муяссянь. Либӧ шӧринсяньыс. Сійӧ, мый вӧчсис Луганскын – империялӧн крӧшитчыны заводитчӧм. Крӧшитчыны заводитӧ сійӧ пельӧссянь, кӧні меститчӧма системалӧн медслаб звеноыс. Кывсьӧ, мый и Донецкын сідзжӧ абу лӧнь, «вежавидзысь мортъяс» петкӧчылӧны пӧ тшӧтш.
Кремль чорыда ворссис Донбассын. Водз ли сёр ковмас мунны сэтысь. Пестыны кӧ нӧшта ёнджык кось, водзӧ нуӧдны агрессиынӧй, усьласяна политика – водзӧсыс оз ло. А лоас нӧшта на чорыдджыка ворссьӧм. Россия веськалас топыдджык изоляцияӧ, йӧршитчӧмӧ.
