Дональд Трамп ӧтвылысь Великобританиякӧд да Франциякӧд вӧчис кучкӧг ракетаясӧн Асад кузя.
Но колӧ тӧд вылӧ босьтны, мый акцияыс лоис жебиник, мода вылас, чужӧмбан видзӧм ради. Кыдзи чайтӧны аналитикъяс, пасьнитӧма лои сӧмын сійӧ местаясӧ, кодъясӧс водзвыв ӧтвылысь урчитісны Рытыввыв да Россия. Но век жӧ...
Ог тӧд коді кыдзи, а ме эг сумлевайтчы, мый ракетаясӧн кучкӧмыс лоас. Мӧд ногыс лоны эз вермы. Ситуацияыс синіс сылань. И лои прав. Ас кадӧ эг сумлевайтчы, мый Трампӧн президентӧн лоӧм бӧрас санкцияяс оз киритны, а мӧдарӧ, нӧшта ёнмӧдасны. И сэки стӧча прогнозируйті. Политикаын эмӧсь асланыс законъяс, кодъясӧс торкны некодлы абу вын серти. Весиг медвына нырщикъяслы.
Эз кӧ водзмӧстчы Трамп тайӧ пӧрйӧ, сійӧс эськӧ ӧткодявны кутісны Барак Обамакӧд, слаб да жеб экс-президенткӧд.
Обама эз кучкы 2013 вося августын, тайӧ вӧлі арталӧма кыдз ворссьӧм, сетчӧг вылӧ мунӧмӧн, а сідзкӧ Путинлӧн вермӧмӧн, коді кутіс нуӧдны агрессивнӧйджык политика да во джын мысти кватитіс Крым, а сэсся пырис Донбассӧ да Сирияӧ.
Кӧть эськӧ военнӧй тӧдчанлун боксянь акцияыс эз сет некутшӧм водзӧс, весиг ни ӧти морт эз пӧгибнит, а тайӧ буртор, но водзӧсыс эм политическӧй фактор боксянь. И абу ичӧт.
Ракетаяслӧн медглавнӧй жертваӧн лоис Путинлӧн кыпыд имиджыс, Ен тшупӧд вылна лэптӧм харизмаыс. Кыдз тӧдса ӧтиӧдся мартын сійӧ истеблишмент водзын сёрниын анонсируйтіс дивӧ- оружие. Эскӧдіс мый вооружениеын, медвойдӧр ядернӧйын Россия став мушарсьыс ёна водзын, вермам пӧ ставсӧ ӧти здукӧн лӧсыштны-кучкыны сідзи, мый вӧрӧгъясысь нинӧм оз коль, пӧимысь кындзи. Йӧзӧдіс асьсӧ кыдз зэв крут мачо. Став мир водзас. А ӧні со яналіс. Кутіс няргыны баба моз, ООН-ӧ норасис.
Эз кӧ эськӧ Путин ошйысь супероружиенас, то Сирия кузя рытыввывса коалициялӧн кучкӧгыс ёнасӧ эз уськӧд сылысь имиджсӧ, а уськӧдіс кӧ, то войт мында. Воштӧгсӧ позис регыдъя кадӧн бӧр бергӧдны.
Но Путин выступитіс сідзи, кыдзи выступитіс. Эм кӧ сылӧн сэтшӧм вына оружие, кодӧс некод оз вермы сувтӧдны, то мыйла сійӧ лэдзис ньӧръявны Асад «воксӧ»? Тані петкӧдчӧ ВВП-лӧн ыджыд репутационнӧй воштӧг. Кремльса кӧзяинлы петкӧдлісны сылысь местасӧ.
Тайӧ петкӧдлӧ и мый Россия пыр ёнджыка йӧршитчыссьӧ, веськалӧ изоляцияӧ. Ортсыса политикалӧн помартмӧм.
Путинлӧн режим некымынысь ворссис ортсыса политикаын. Гоз-мӧд падмӧг и… код тӧдас, вермасны чӧвтны власть бердысь. Историяысь тӧдам, Россияын властьлы прӧститлісны быдтор, и йӧзӧс дзескӧдӧм, и виалӧм и тшыгйӧдӧм… быдтор, эз прӧстилыны сӧмын ӧтитор, — ворссьӧм.
Телевидение юӧртіс Путин да Турцияса президент йитчылісны пӧ телефон пыр да видлалісны водзӧ воськовъяс йылысь мӧвпъяс. Бара дасьтӧны кутшӧмкӧ провокация! Буретш татшӧм «воканасьӧмыс» и эз ӧтчыдысь вайӧдлы уна шог сирияса войтырлы. И водзӧ оз кӧсйыны ӧвсьыны пеж воськовъясысь.
Но кымын водзӧ писькӧдчас мирса разнӧй пельӧсын слабмысь империя, сымын сылы лёкджык, сымын топыдджык налькйӧ веськалас. Сирия вочасӧн пӧрӧ Афганистанӧ.
Ситуацияыс кутас быть сӧвмыны лёклань. Косьыс майшасьтӧг ёсьмас. Ракетаясӧн кучкӧгъясыс нӧшта на лоасны, таын ме ог сумлевайтчы. Олӧмыс тшӧктас, некытчӧ сэсся лоас воштысьны, оз ло мӧд туй, кучкӧг вӧчӧмысь ӧтдор. Россия да Рытыввыв костын веныс лоас ёсьджык.
И ворссяс Россия. Водз ли сёр. Оз кӧ аски, то аскомысь, оз кӧ аскомысь, то аскомысь бӧрын. Мӧд ногыс лоны оз вермы. Таын ог сумлевайтчы. Россия ворссяс медвойдӧр сы вӧсна, сійӧ помка серти, мый сылӧн политическӧй системаыс мӧдджык, чем Рытыввывса кананъяслӧн. Системаыс лёкджык, туйтӧмджык.
Буретш бӧръя лоӧмторйын и петкӧдчис тайӧ.
Политическӧй сфераын медглавнӧйторйыс — система. Буретш таын Россия кольччӧ бӧрӧ. Россиялӧн медся слабиныс — политическӧй системаын. Тані и помкаыс, мыйла тадзи артмис, а эз мӧдарӧ.
