Россияса нималана журналист Николай Сванидзе юӧртіс ассьыс видзӧдлас Украинаын Голодомор (комиӧн кӧ, Тшыгвиӧм) йылысь . Сы серти, Украиналы оз пӧ ков йӧзӧдны тайӧ шуштӧм лоӧмторсӧ геноцидӧн. Тані абу пӧ национальнӧй подулыс, тшыгъялӧмысь кувсисны эз сӧмын Украинаын, но и Россияын до Казахстанын. Мед пӧ ӧтвылысь сёрнитчасны та кузя.
Но нӧшта ёнджыка шогӧдіс Сванидзелӧн строкаяс, кӧні сійӧ документыслы ляскӧма «антироссийский, антирусский» пас. Быттьӧ сёрнитӧ оз либерал, а этш воштысь черносотенец.
Ме некыдз ог вермы ӧтвизяасьны тайӧ мортыскӧд. Эз кӧ вӧв Украинаын Тшыгвиӧмыс, гашкӧ и Донбассын ӧнія войнаыс эз жӧ пансьы. Сэки бырӧдны зілисны буретш украинецъясӧс. Тайӧ нацияыс зілис петны империяысь. Тшыгвиӧмӧн бырӧдісны йӧзсӧ, а на местаӧ овмӧдісны Россияысь быдсямасӧ, казакъясӧс да с.в. Пуктісны вуж талунъя войналы. Украина дорйысьӧ, дорйӧ ассьыс асшӧрлунсӧ, а Сванидзе да сы коддьӧмъяс усльласьӧны тайӧ страна вылас. Мортыс лиӧ йӧй, либӧ тӧдӧмысь туйдӧ лёксӧ.
А Россияын оз кӧсйыны йӧзӧдны Тшыгвиӧмсӧ геноцидӧн сы вӧсна, мый власть бердас эмаолӧны чекистъяс. Аслыс паныд найӧ ӧдвакӧ мунасны. Казахстанын оз жӧ йӧзӧдны сы вӧсна, мый тайӧ республикаыс зависитӧ Россияысь.
Татшӧм йӧзыслӧн кыдз Николай Сванидзе эм ӧти зэв ыджыд тырмытӧмтор: найӧ оз гӧрвоны ӧтитор: либеральнӧй империя лоны оз вермы! Эз кӧ вӧвны татшӧм йӧзыс, сэки Путин эз эськӧ вӧв власть бердын. Сванидзе коддьӧмъяс понда и Путин лоис диктаторӧн. Сатирик Салтыков-Щедрин гижліс, быд выль начальник – тайӧ мича зон да шань лов. Кор 1999-ӧд воӧ петкӧдчис Путин, уна демократ нимкодясис, со ӧд кутшӧм сійӧ бур. А кытчӧдз сійӧ ӧні вайӧдіс!? Россияын диктатура, сюртчӧ война бӧрся войнаӧ. Мый, та йылысь мечтайтісны российскӧй либералъяс!?
«Сӧстӧм» либералъяс надейтчӧны лоны позьтӧм вылӧ, мый Россия волшебниклӧн бедьӧн ӧвтыштӧм бӧрын лоас тыр свободаа, асмезда. Тайӧ ылӧдчӧм, вермыны позьтӧмӧ эскӧм. Сы вӧсны, мый та ыджда государствовоас оз некор ло ни демократия, ни либерализм. Серпасыс лоӧ сӧмын лёкджык, абу сӧмын воысь во, а лунысь лун. Оласногыс синӧ фашизмлань. А штатӧ пырысь либералъяслӧн могыс кольӧ вежаӧдны тайӧ процессӧ, туйвизьсӧ. Мича кывъясӧн подулалӧмӧн, вӧчны чужӧм, мый быттьӧ ставыс лючки.
Путинизмлӧн вужъясыс – 1990-ӧд воясын. Сэки и чужис тайӧ шуштӧм политическӧй системалӧн подулыс. Сэк, кор Россияын видлісны мунны либерализм туйӧд. Ошыбкаыс сыын, иый тайӧ идеологиясӧ видлісны тувъявны обществолӧн организмӧ вынӧн, вылітянь кананлӧн ресурсъясӧн вӧдитчӧмӧн. Чайтісны, оз кӧ ставыс лючкиа мун, колӧ нӧшта чорыдджыка тувъявны. Нем думайттӧг. Но лоис бӧрлань бергӧдчан эффект. Европа либерализмӧ воис надзӧник, уна сё во чӧж, эволюционнӧй туйӧд. Та вӧсна и вужъявсис.
Либерализмӧ Россия кыдз «юклыны позьтӧм» империя оз вермы синны. Путинизм ясыда тайӧс петкӧдліс.
Либерализм позьӧ вужйӧдны сӧмын национальнӧй кананын суйӧр пытшкын, да и то уна каддыр чӧжӧн. Империя да либерализм – лӧсявтӧмтор, ӧта-мӧдлы паныд сулалысьяс. Но тайӧс кызван российской политик, кодъяс асьсьӧ пасйисны либерал пасӧн оз гӧгӧрвоны. Либӧ оз кӧсйыны гӧгӧрвоны.
