Лыдди Доръям асьнымӧслысь коми войтырлӧн съезд кежлӧ вӧзъян проектсӧ. Кутшӧм мӧвпъяс воисны юрӧ?
Популизмыс вывті уна. И сійӧ кутшӧмкӧ тешкодь. Эмӧсь политикъяс, кодъяс популизмӧн вӧдитчӧны зэв кужӧмӧн, кыдз инструментӧн да тадзи шедӧдӧны вермӧм, коді сетӧ позянлун писькӧдчыны президентлӧн либӧ депутатлӧн креслӧӧ.
Доръям асьнымӧслӧн популизмыс бӧб кагалӧн кодь, челядясян. Вӧзйӧмъяссьыс серам петӧ. Колӧ пӧ чинтыны республикаын пенсия вылӧ петан арлыд вит во вылӧ. Стӧча кӧ, бӧр сійӧ жӧ тшупӧдӧдз, кытшӧм вӧлі реформаӧдз. Мӧд ногӧн кӧ, киритны Путинлысь поправка-вежсьӧмъяссӧ, примитӧм законсӧ. А тайӧ шӧр властьлы восьсӧн паныд мунӧм. Дерт, некод оз примит да вынсьӧд.
Мӧд вӧзйӧмыс -- лӧсьӧдны аскиа поколенияслысь фонд. Дум вылӧ усьӧны Кувейт, Катар, Оман да Ӧтувъя арабскӧй Эмиратъяс. Лӧсявтӧм балаяс. Коми Республика збыль вылас империялӧн колония.
Сэсся Доръям асьнымӧс петіс нӧшта некымын вӧзйӧмӧн, шуам вежны налогӧвӧй политика, чинтыны вот да с.в.
Эз вӧв сӧмын ӧти, но медся тӧдчана вӧзйӧм, -- национальнӧй кыв кузя. Кыдз тӧдса, Россияса власть примитіс кывъястӧ дзескӧдана закон. Та йылысь шы ни тӧв. Мыйла? Доръям асьнымӧслы абу кивыв, рейтингтӧ он кыпӧд. Популизмыс веніс, йӧзлы любӧй ногӧн кажитчыны зільӧм, ворсӧдчӧмӧн да зарни гӧраяс кӧсйысьӧмӧн. Кокниа овны быдӧн кӧсйӧ, этшаджык уджавны, личӧдчыны, рушкутӧ тыртны, а духовнӧй сёяныд шыбитантор.
Буретш популизм понда Доръям асьнымӧс чорыда ворссис съезд вылас, яналіс, лэдзис ассьыс авторитетсӧ плинтусысь улӧдзджык. Ворссис кык визь серти, и электоральнӧя. мандатъяс лыдӧн, и моральнӧя. Мӧдыс тӧдчанаджык. Моральнӧй ворссьӧм медся сьӧкыд. Лов воштӧмсӧ торйӧн сьӧкыд бӧр компенсируйтны, вевтыртны. Кокни туйыд -- абу медся бур.
Кыдзи эськӧ колӧ вӧлі асьсӧ кутны Доръям асьнымӧс ютырлы съезд вылас, кутшӧм резолюцияӧн водзмӧстчыны? Колӧ вӧлі петны кывтӧ доръян туйвизьӧн. Ме кӧ эськӧ чуксалі йӧзӧдны коми кывтӧ республикаын ӧтка кана кывйӧн. Но Доръям асьнымӧсса вермис небыдджык туйӧд мунны, кӧть нин киритны законсӧ, коді дзескӧдӧ национальнӧй кывъяссӧ.
Но бурджык дерт корны сетны коми кывлы ӧтка кана статус. Оппозицияса кандидат сідз ли тадз сё равно эськӧ ворссис. Но ворссис сӧмын гӧлӧсуйтігӧн, а моральнӧя эськӧ шедӧдіс вермӧм. Сэки позис шуны, ми огӧ ворсӧдчӧй популистскӧй лозунгъясӧн, а ми вӧзъям кӧть и непопулярнӧй, олӧмӧ сьӧкыда пӧртан, но аскиалунлы зэв колана мӧвпъяс.
Черчилль лоис великӧй мортӧн буретш сы вӧсна. мый некодлы эз кӧсйысь зарни гӧраяс да кокниа олӧм, а веськыда висьталіс, мый синваысь да сьӧкыдлунысь ӧтдор нинӧм оз вермы сетны йӧзлы. Мыйла Доръям асьнымӧссаяс пиысь эз сюр "коми Черчилль"?
