Россияса сборнӧй шедӧдіс чемпионат вылас кык вермӧм, пасьвартіс Саудовскӧй Аравияӧс да песовтіс Египетӧс. Первойя жӧ луннас правительство юӧртіс, мый лэптас пенсия вылӧ петан арлыд. А сыӧдз заводитіс нуӧдны восьса тыш национальнӧй кывъяслы паныд.
Збыль вылас Россияса власть век нуӧдліс йӧзыскӧд войнаяс. Первойя жӧ вояссяньыс, кор чужис тайӧ империяыс. Тӧд вылӧ кӧ босьтны опричнина кад либӧ репрессияяс сталинизм ыджыдалігӧн, то тайӧ аслыспӧлӧс чужӧмбан, коді медся стӧча серпасалӧ кананлысь прӧстӧй йӧз дорӧ видзӧдлассӧ.
Пенсия арлыд содтӧм да кывъяс дзескӧдӧм – тайӧ кык лоӧмторйыс кӧть и веркӧсас видзӧдлӧм бӧрын чайтсьӧны зэв разнӧй петкӧдчанторъясӧн. Быттьӧ ӧткодьыс нинӧм абу. Но тайӧ кыдз шуласны ӧти и сійӧ чеплӧн йитвежъяс. Коді шусьӧ: морт дорӧ лёка относитчӧм, сійӧс морт пыдди пуктытӧм, гаг тшупӧдӧ лэдзӧм.
Тайӧ шусьӧ – войтырлы войнасӧ восьсӧн йӧзӧдӧм. Кӧть век нуӧдліс, уна нэм чӧж, но кызвын кадсӧ гусьӧн, латентнӧя, мича кывъяс сайӧ дзебсьӧмӧн. корчсюрӧ и йӧзлысь олӧмсӧ кокньӧдӧмны кӧсйысьӧмӧн. А тайӧ пӧрйӧ война йӧзӧдӧмыс яндзим тӧдтӧм, демонстративнӧй, чужӧмбаналана, восьсӧн. Вероломнӧя. став мораль торкалана.
А мыйла тадзи артмис? Сы вӧсна, мый Россияын пансис вежны позьтӧм власть. Путинӧс выль срок кежлӧ колисны веськӧдлысьӧн. Татшӧм властьыс медся лёк. Сійӧ гӧгӧрвоӧ, мый бӧрыньтчыны оз вермы, эновтны пуклӧсъяссӧ оз жӧ. Мунас кӧ, сэки ковмас чорыда кыв кутны став мыжысь да преступлениеысь. Бӧрыньтчыны кӧ оз позь, кольӧ сӧмын водзыньтчыны. Мый и вӧчсьӧ.
Войнаяссӧ, кодъясӧс власть нуӧдліс Россияын пытшкӧсса политикаын позьӧ юклыны кык пельӧ: ӧтияссӧ – элитаяслы паныд, мӧдъяссӧ – войтыркӧд. Но стӧча шуны, кутшӧм война дзоньнас нуӧдсис элитаяслы паныд, сьӧкыд вайӧдны. Гашкӧ сӧмын опричнина да сталинизм, но войтырлы паныд косьыс некор эз лӧньлы.
Но война – тайӧ сэтшӧмтор, кӧні кодкӧ вермӧ, а кодкӧ ворссьӧ. Мыйӧн помасяс ӧніяыс? Вермас кӧ власть, Путинлӧн режим ёнмас, вынсяммас, лоас нӧшта на авторитарнӧйджык, дзескӧдысьджык. А власть кӧ ворссяс, Россияын кыптас революция.
Но эм и коймӧд вариант. Кор веныс помасяс ничьяӧн, кор некод некодӧс оз сяммы венны. Тайӧ лоӧ, содтасны кӧ пенсия вылӧ петан арлыдсӧ гоз-мӧд во вылӧ, а унджыксӧ оз артмы, йӧзыс чорыда сувтасны паныд. Серпасыс лоӧ шуны кӧ шахмат кывйӧн, – пат. А тайӧ кутас ӧткодявсьыны кыдз Путинлӧн ворссьӧм.
Сэки мый? Медым ворссьӧмсӧ компенсируйтны-киритны, панас нӧшта ӧти война. Колӧ чайтны ортсыса фронт вылын. Став воськолыс, кодъясӧс вӧчис путинизм бӧръя воясӧ, буретш тайӧс и петкӧдлӧ. Паніс война Донбассын, сибдіс сэні, мый гӧгӧрвосьӧ кыдз ворссьӧм. Медым компенсируйтны падмӧгсӧ, уськӧдчис сириецьяс вылӧ, найӧс бомбитіс. Но и сэні сибдіс.
Ӧні со вуджис пытшкӧсса фронт вылӧ. Путин воюйтӧ национальнӧй кывъяскӧд, пенсионеръяскӧд, оппозиционеръяскӧд, мӧд ног юрбитысьяскӧд да ставыскӧд, коді оз сибав политическӧй системаас. А Донбассӧ да Сириясӧ кад кежлӧ вештіс политикалӧн ылі пельӧсӧ.
Путинскӧй режим веськаліс топыд налькйӧ. Кытысь петны воштытӧг оз позь. Сылы колӧ либӧ вермыны, либӧ сійӧс вермасны. Оз кӧ артмы вермӧгыс, сійӧс суас власть бердысь чӧвтӧм. Тодмышкаласны медвылыс пуклӧссьыс.
Тӧдӧ-ӧ тайӧс ставсӧ ачыс Путин? Сьӧкыд шуны. Сійӧ чайтӧ, мый Россияын тэчӧма идеальнӧй политическӧй система. Мый ворссьӧм лоны оз вермы, сӧмын триумф бӧрся триумф. Тайӧ ылӧдлӧ нацнырщиксӧ, сійӧ воштӧ юр вемсӧ, лючкиа мӧвпалӧмсӧ да вӧчалӧ чорыд ӧшыбкаяс.
Путин кутӧ асьсӧ сідзи жӧ, кыдзи и сыӧдз став веськӧдлысьыс, йӧз дорас веськодьлун да мустӧмтӧм.
Пенсионеръясӧс дзескӧдан бала – Путинлӧн нӧшта ӧти фронт визь. Кымын лӧас нӧшта?
