Лыдди Никита Краевлысь «Стоит ли хоронить Ленина?» гижӧд да кӧсъя юксьыны аслам видзӧдласӧн.
Сійӧ гижӧ, мый чуксалӧм-вӧзйӧмыс Ленинӧс петкӧдны Мавзолейысь да гуавны вермас вайӧдны гражданскӧй войнаӧдз. Кӧть тӧдчӧдіс, мый тайӧ чукӧстӧмыс лоӧ оз помкаӧн, а тойыштанторйӧн, тойлаӧн.
Ме жӧ лыддя, мый Ленин вӧсна, стӧчджыка кӧ, сылӧн телӧ-коляс понда некод оз кут вир кисьтӧмӧдз косясьны. И помкаӧн оз ло. Оз ло спускӧвӧй крючокӧн. Абу сӧглас Краевкӧд и мый россияналӧн социальнӧй поляризация, вывті озыр да вывті гӧльяс вылӧ юксьӧм вермас вайӧдны гражданскӧй войнаӧ. Ме серти, ӧдвакӧ. Тайӧ нелючкиыс разьсьӧ ёнджыкасӧ социальнӧй протестъяс отсӧгӧн, но оз лыйсьӧмӧн да виалӧмӧн.
Гражданскӧй войналӧн вуж-природаыс дзик мӧд. Сійӧ пансьывлӧ сэк, кор общество шӧрипӧв юксьӧма кык ылӧсас ӧтыджда юкӧн вылӧ. Но и тайӧ абу тырмымӧн лёк пансьӧм вылас. Гражданскӧй войнаӧдз волывлӧ сӧмын сэк, кор обществоын юксьӧмыс воис антагонистическӧй тшупӧдӧдз. Кор обществолӧн ӧти джынйыс кӧсйӧ, медым страна вӧлі ӧти сикас, муніс ӧти туйӧд, мӧд юкӧн чорыда сулалӧ мӧд туйвизь вӧсна. Кор кыпӧдӧма юалӧм: кутшӧм туйӧд восьлавны страналы. Помкаыс – водзӧ олан да сӧвман стратегияын, ыджыд могын, коді шымыртӧ ставнас кананӧс, став йӧзкотырсӧ, обществоӧс.
А Ленин – тайӧ тӧрытъялун. Сійӧс вермасны гуавны, и Мавзолейсӧ разьны либӧ кисьтыны, памятникъяссӧ пасьйыны сӧмын кор Россияын политическӧй пытшкӧсса оласног вуж выйынӧдз вежсяс. Гражданскӧй война пансьывлӧ дзик мӧд помкаяс понда. Но оз шой вӧсна.
