Пресс-конференция вылас Россияса диктатор Путин, кор сылысь юалісны оппозиция йылысь, заводитіс повзьӧдлыны йӧзсӧ Майданӧн. Мый некымын дас Саакашвили кутасны котравны изэрдъяс кузя да дзугны-торкавны лючкиа оласногсӧ. Ыджыдалысь режимса веськӧдлысь диктатор, коді дзескӧдӧ йӧзсӧ, нуӧдӧ ортсыса агрессивнӧй политика, репрессируйтӧ украинецъясӧс да крымса татараӧс. Тойлалӧ Россияӧс аскиа катастрофаӧ.
Колӧ пасйыны, бӧръя кадӧ ёсьмис оласногыс Украинаын. Вензьӧмыс йитчӧма Михаил Саакашвилилӧн водзмӧстчӧмкӧд. Российскӧй пропаганда помся дольӧ, сэні пӧ дзугсис олӧмыс, украинецъяс пӧ немӧ воисны, ӧти кывйӧн кӧ ловйӧн сісьмӧны. Но юавсьӧ, кодлы кивыв веныс? Кремльлы, кодлӧн пропаганда кисӧ радпырысь ниртӧмӧн дольӧ, регыд пӧ сэні лоӧ выль Майдан. Тӧдӧмысь, кӧсйӧны надейтчыны нетшыштны Украинылась нӧшта му кусӧк. Кыдзи вӧлі воддза Майдан бӧрас.
Но некутшӧм выль Майдан Украинаын оз нин ло. Сы вӧсна, мый сэні демократия да позьӧ властьсӧ вежны бӧрйысьӧм отсӧгӧн. Тайӧ Россияӧс виччысьӧ Майданыс.
А мый вензьӧны Украинаын, мый сэні сэтчӧс правительстволы паныд митингъяс – тайӧ сы вӧсна, мый демократия дырйи политическӧй процессъясыс нуӧдсьӧны восьса ногӧн, протест акцияяссӧ сэні некод оз позьтӧмав, оз запретит. Эм право да позянлун аспеткӧдчӧм вылӧ.
Россияса пропаганда либӧ оз гӧгӧрво тайӧс, либӧ тӧдӧмӧн сӧрӧ. Весиг «Новая газетаысь» обозреватель Кирилл Мартынов босьтчис дивитны Украинаӧс политология вылӧ ыстысьӧмӧн. Тайӧ мортыс эз ӧтчыдысь гижлы властьӧс ошкана да оппозицияӧс дивитана материалъяс. Тыдалӧ латентнӧй путинист, ошкӧ режимсӧ оз веськыда, а мудера.
Сёрнитны кӧ политология сюрӧса ногӧн, то эм сылӧн сэтшӧм юкӧн: Конфликтология. Коді висьталӧ, мый быд обществоын эм уна сикас вен. Конфликттӧм общество абу. Быдлаын сійӧ эм. Конфликтология кузя теоретикъяс тӧлкуйтӧны, мый конфликтъяс оз слабмӧдны-кисьтыны системасӧ, а вӧчӧны сійӧс нюгыльджыкӧн да зумыдджыкӧн. Льюис Козер серти, кымын унджык вен обществоын да кымын ёнджыка найӧ торъялӧны ӧта-мӧдсьыс, разнӧйджыкӧсь и ӧбича да синанвизь серти, сымын бурджык. Сэки сьӧкыдджык артмыны ситуациялы, коді юкас став йӧзсӧ кык лагер вылӧ. Тайӧ мездӧ гражданскӧй войнаысь.
Конфликттӧм обществоясӧн асьсӧ пӧръясьӧмӧн шуӧны авторитарнӧй да тоталитарнӧй кананъясса режимъяс. Кӧні вен петкӧдчӧмсӧ вынӧн пӧдтӧны, медым сэсся ошйысьны, со пӧ миянын кутшӧм бур, ставыс лючки, ставыс дӧвӧленӧсь, а мукӧдлаас помся зыксьӧны. Помасьӧ сійӧн, мый гӧрӧдъясыс, проблемаяс да венъяс пырӧны организм пытшкас пыдіӧ, сэні найӧ нӧшта ёсьмӧны да ёнмӧны, а сэсся, кор системаыс слабмӧ, петӧны ортсыӧ да кисьтӧны системасӧ. Кыдзи эз ӧтчыдысь вӧвлы российскӧй историяын.
Сідзкӧ тышыс Саакашвили да Порошенко костын ӧдвакӧ кисьтас Украинаӧс. Уна вылӧ, зыкыс помасяс сӧмын сійӧн, мый Порошенколӧн чинас рейтингыс да сы вӧсны йӧзыс локтан бӧрйысигӧн оз гӧлӧсуйтны. Тайӧ оз ло Украиналы кыдз асшӧр каналы пом, а мӧдарӧ на, ёнмӧдас политсистемасӧ. Кӧть кремльсаяс чайтӧны мӧд ног. Коді ыззьӧдӧ украинапытшса косьсӧ? Россияса режим. Дерт, оз восьсӧн, а мудеритӧмӧн, аддзыны позьтӧм сунисъяс отсӧгӧн тракйӧдлӧмӧн, чекистскӧй спецоперация нуӧдӧмӧн. Путинлӧн радейтана чача. Сійӧ мӧвпалӧ тадзи: пестам украинаса костын пытшкӧсса кось, сэні пансяс гражданскӧй война и ми тайӧ канансӧ куш киӧн босьтам, кватитам, сӧльнитам Россия улӧ. Кремльса тӧдӧмӧн зільӧ быд ногыс люкӧдны украинецъясӧс ӧта-мӧдыскӧд, пестыны кось. Гуся мӧвпӧн, мый Украина кыдз асшӧр канан киссяс. Оз. Тайӧ кананас позьӧ лючкиа вежны властьсӧ. Сӧмын Россияын оз позь.
Оз ло тадзисӧ. Сысь на унджык, Киевса суд мездіс арест улысь Михаил Саакашвилисӧ. Тайӧ петкӧдлӧ, мый украинаын судебнӧй системаыс асшӧр да оз кывзысь властьлысь. Тайӧ Россияын суд – зептӧ сюйӧм эмтор быттьӧ. Век вӧчӧ сідзи, кыдзи индасны вылісянь.
Кывкӧртӧд: площадь вывті некымын дас Саакашвили – тайӧ бурджык, чем сійӧ, мый виччысьӧ Россияӧс мыйтакӧ кад мысти. Лоӧ кӧ кӧнікӧ гражданскӧй войнаыс, то оз Украинаын, а Россияын. Сы вӧсна, мый Украинаын политическӧй системаыс бурджык, сӧвмӧмджык, сідзкӧ аскиалунаджык. А Россияын некытчӧ туйтӧм. Путинскӧй Россияӧс виччысьӧ сыркмунӧм да гражданскӧй вир кисьтана тыш.
