Ог тӧд, колӧ-ӧ меным реагируйтны ӧти пежшог-блогерлӧн сӧрӧм вылӧ, но век жӧ люддя коланаӧн юксьыны ӧткымын мӧвпӧн. Сы вӧсна мый сёрниыс мунӧ тӧдчанатор йылысь.
Сійӧ ӧткодялӧ Воркутаӧс Севастополькӧд. Мӧдас кӧ пӧ оз велӧдны крымско-татарскӧй кыв, то и первойяас оз пӧ шуӧ ков велӧдны комиӧс. Но тайӧ лосявтӧмтор. Танӧ колӧ артавны тадзи: пырӧ кӧ Севастополь Крым Республикаӧ, а сэні кӧ татар кыв лыддьыссьӧ кана кывйӧн, то быть велӧдсьӧ. Закон да Конституция серти.
Кӧть эськӧ кывлі, мый быттьӧ Севастопольсӧ торйӧдӧмаӧсь асшӧр субъектӧ Федерациялӧн, петкӧдӧмаӧсь Крым борд улысь. Буретш та понда и сэні ӧтдортчисны крымско-татарскӧй кыв велӧдӧмысь. Мый тайӧ торъя субъект, а абу Крым Республика.
Ме лыддя, мый Севастополь должен лоны Крым пытшкын, а Крымлы колӧ лоны украинасалӧн. Тайӧ международнӧй, ставмирса инӧд серти.
Пыдісянь кӧ мӧвпыштны, ньӧти эг гӧгӧрво, мыйла колӧ вайӧдны ӧтлаын Воркутаӧс да Севастопольсӧ. Кӧні тані коланлуныс? Тайӧ кык карыс торъялӧны географической меститчанінъясӧн, климатӧн, олансикасӧн да с.в. А правовой боксянь каръясыс ӧткодьӧсь.
А ӧткодьлуныс «крыммиян» да кыв репрессия костын абу. Ӧтиторйысь кындзи. Россияын авторитаризм ёнмӧмын, политическӧй режимлӧн жальтӧдтӧмлун содӧмын. «Крыммиян» бӧрын вӧчсис уна лоӧмтор, пестыссис война Донбассын да Сирияын. Серпасыс лёкмис. Со мыйын помкаыс. А веськыд цитӧдыс крыммиян да кыв репрессия костын абу.
Сідзкӧ юавсьӧ, коді шыбласьӧ ӧтарӧ-мӧдарӧ. А сылӧн социальнӧй да психологическӧй чужӧмбаныс ёна мисьтӧмджык. Ӧти боксянь кӧ, быттьӧ Путинлы паныд, мӧд боксянь кӧ ошкӧ сылысь индӧдъяссӧ. Колӧ бӧрйыны, сэтчӧ либӧ татчӧ. Гогӧрвоны, путинизм кӧ пӧрас, став национальнӧйыс, тшӧтш и кывхяс петасны ортсыӧ, водзмӧстчасны, кыпӧдасны юалӧм сӧвмӧдӧм йылысь. Тайӧ мортыс кӧ оліс шуам кызьӧд нэм заводитчигӧн, эськӧ зэв бура слӧймис «Сьӧд сотня" борд улӧ, лов сюрӧсыс зэв ёна лӧсялӧ тайӧ пеж котыр дорас. Тайӧ ксенофоб, социальнӧй пыдӧс, коді лӧгалӧ став вылас, коді неуна торъялӧ сыысь. Сэтчӧдз воис, мый лӧгалӧ, мый «Новый Север» газетын петӧны коми кывъ материалъяс. Со кытчӧдз позьӧ воӧдчыны. Со татшӧм пежлов. Но ӧд и миян сайт вылын петалӧны коми кывъя гижӧдъяс. Логалӧм вылӧ нӧшта ӧти помка.
Веськыда кӧ шуны, татшӧмъясыскӧд оз ков кутны некутшӧм йитӧд, оз позь пытрсьыны диалогъясӧ, а медбур не казявны. Колӧ-ӧ меным вочавидзны? Ме сӧмын юкся мӧвпъясӧн, видзӧдласӧн..
