Нелямын лунысь дырджык нин Россияса тюрьмаын тшыгйӧдчӧ украинскӧй режиссер Олег Сенцов. Кодӧс вӧлі суклялана приговор серти судитӧма кызь во кежлӧ.
Сенцевӧс мездыны корӧ позьӧ шуны став мирыс, Россияса водзмӧстчысь общественность, и Европаса депутатъяс и ООН-са веськӧдлысьяс. Но Путинлӧн морт сёйысь режимыс весиг кывзыны оз кӧсйы. Мед пӧ судитӧма шыӧдчас помилование корӧмӧн.
Мый вылӧ Олег Сенцов вочавидзис: ме некор некутшӧм помилование корны Путинлысь ог кут. Помилование корӧмӧн шыӧдчӧны мыжаяс, а ме абу мыжа.
Мортсӧ йӧртӧмаӧсь сутшкасьысь сутуга сайӧ быттьӧ пӧ терроризмысь. Кор кывлан «террорист" кыв, дум вылад усьӧны Бен Ладен, Игил (*) да тошка джихадист. Кутшӧм нӧ террористӧн вермас лоны морт, коді дзик мӧд ног асьсӧ кутӧ, коді режиссер, снимайтӧ фильмъяс. Кӧсйӧма пӧ взорвитны Ленинлысь памятник. Ӧти-кӧ, тайӧ -- подулавтӧмтор, некутшӧм збыль фактъясӧн абу подулалӧма. Сӧмын мӧд мортлӧн висьтасьӧм вылӧ мыджсьӧмӧн, да и висьтасьӧмыс лои суклясьӧм, сы вӧсны мый ФСБ-са повзьӧдлӧмӧн тшӧктӧма тадзи вӧчны.
Мыйла Путин оз кӧсйы лэдзны асмезд вылӧ Олег Сенцовӧс? Ӧд абу кивыв тайӧ мортсӧ видзны неволяын, мый падмӧдӧ Россиялысь авторитетсӧ, коді сідзи нин ичӧт. Путин оз мезды сы вӧсна, мый Сенцов колӧ сылы кыдз заложник. Кодӧс позьӧ вузавны ыджыд донысь. Кымын тӧдчанаджык репутацияа заложникыс, сымын ыджыдджык донысь позяс вузавны мортсӧ. Позис эськӧ вежны Украинаын судитӧм йӧз вылӧ, кодъяс сулалӧны Россия дор, кодъяс таысь и пукалӧны.
Но тані эм нӧшта казус. Кремльса шуасьӧ, мый быттьӧкӧ пӧ Сенцов – Россияса гражданин. Кӧть мортыс асбсӧ шуӧ Украинаса гражданинӧн, а Россияӧс синнас оз аддзы. Тайӧ смекайтчӧм. Кор кватитісны Петербургын теракт бӧрын мортсӧ, кодӧс чайтӧны мыж вӧчысьӧн, сылысь киритісны Россияса гражданство. Кӧть мортыс корис не киритны. Тайӧ тешкодьтор: ӧтиӧс мырдӧн шуӧны ас гражданинӧн, кӧть сійӧ оз кӧсйы, мӧдлысь мырддьӧны гражданство, кӧть сійӧ оз кӧсйы воштыны.
Со и Кремльса шуасьӧ, Сенцов пӧ Россияса гражданин, а ас гражданаӧс огӧ вежӧй мӧд кананса йӧз вылӧ. Тайӧ – заложник вылӧ дон лэптӧм сяма. Россияса гражданин кӧ, то и ыджыдджык донысь позяс вузавны. Вермас лоны, мый Кремль мечтайтӧ вежны Америкаын пукалысь россияна вылӧ, код тӧдас?
Да и гражданствоын ӧмӧй делӧыс! Тадзи кӧ, то эм прецедента пример. Кыдз тӧдса Кӧдзыд война кадӧ вежлісны диссидент, СССР-са гражданин Владимир Буковскийӧс да Чилиса гражданин Луис Карволанӧс. Коді кутшӧм паспорта – абу тӧдчана.
Босьтны заложникӧ да сы тшӧт весьтӧ шедӧдны водзӧс – тайӧ традицияыс жаль тӧдтӧм ЧК-КГБ-лӧн, а талунъя кадӧ со ФСБ-лӧн.